पुणे : मराठा साम्राज्यासाठी महत्त्वाच्या ठरलेल्या पानिपतच्या तिसऱ्या युद्धावर बनविण्यात आलेल्या पानिपत चित्रपटासाठी दागिने घडविण्याचा मान पु. ना. गाडगीळ आणि सन्सला मिळाला आहे. या चित्रपटात वापरण्यात आलेले पारंपरिक शैलीचे दागिने पाहण्याची संधी पुणेकरांना मिळणार आहे. पु. ना. गाडगीळ आणि सन्सतर्फे औंध, हॅपी कॉलनी आणि सातारा रोड येथील दालनांमध्ये या दागिन्याचे प्रदर्शन आयोजित करण्यात आले आहे.
पहिले प्रदर्शन औंधमधील वेस्टएंड सेंटर वनमधील रिलायन्स मार्टशेजारील पु. ना. गाडगीळ आणि सन्सच्या दालनात १९ नोव्हेंबर ते एक डिसेंबरपर्यंत सकाळी ११ ते रात्री ८.३० दरम्यान सर्वांसाठी विनामूल्य खुले आहे. कोथरूडमधील हॅपी कॉलनी येथील दालनात २६ नोव्हेंबर ते आठ डिसेंबर आणि सातारा रोड (वाळवेकरनगर) येथील दालनात चार डिसेंबर ते २२ डिसेंबरदरम्यान हे प्रदर्शन आयोजित करण्यात आले आहे.
या प्रदर्शनाबाबत पु. ना. गाडगीळ आणि सन्सचे संचालक व अध्यक्ष अजित गाडगीळ म्हणाले, ‘चित्रपटाचे दागिने हे महाराष्ट्रीय शैलीबरोबरच उत्तरेकडील शैलीतील असून, दागिन्यांसाठी विशेष संशोधन केले आहे. हे दागिने विविध राज्यांतील आमच्या कारागीरांनी घडविले आहेत. सोन्याबरोबर कुंदन, मोती आणि विविध रंगांच्या स्टोन्सचा वापर दागिन्यांत आहे.’
‘पारंपरिक मराठा व पेशवाई शैलीचे उत्तम कलाकुसरीचे दागिने घडविण्यात पु. ना. गाडगीळ आणि सन्सचा हातखंडा असल्याने आम्ही ‘पानिपत’साठी पु. ना. गाडगीळ आणि सन्सची निवड केली,’ असे ट्विट या चित्रपटाचे दिग्दर्शक आशुतोष गोवारीकर यांनी केले होते.
दागिन्यांबाबत पु. ना. गाडगीळ आणि सन्सचे सीएफओ व विक्रीप्रमुख आदित्य मोडक म्हणाले, ‘चित्रपटासाठी आठशेहून अधिक प्रकारचे दागिने घडविले असून, यात नेकलेस, बांगड्या, डोक्यातली फुले, कडे, अंगठ्या, कंबरपट्टे, शिरपेच, वाक्या, आदींचा समावेश आहेत. प्रदर्शनातील दागिन्यांवरून खरेदीसाठी ऑर्डरही देता येईल.’